Бранителот Баерн со четири гола го среди Атлетико, Реал Мадрид доживеа неочекуван пораз дома од Украинците, Интер се спасуваше од пораз против Борусија Менхенгладбах, победи за Ливерпул, Манчестер Сити и Аталанта.
Ако по утрото денот се познава, тогаш и оваа сезона треба да биде одлична за актуелниот шампион Баерн. Во Минхен со 4:0 настрада не било кој туку мадридски Атлетико со двата гола на Кингсли Коман и едниот на Леон Горецка и Корентен Толисо. Тимот на Диего Симеоне беше во подредена улога упатувајќи само еден удар во рамките на голот на Мануел Нојер во 90-те минути.
Изненадувањето на денот синоќа се случи во Мадрид каде Реал уште на полувреме губеше со неверојатни 0:3 од Шахтар. Тете, автоголот на Рафаел Варан и Манор Соломон се погрижија за фуриозни 45 минути на донецкиот тим. За 15 минути во вториот дел Реал успеа да намали на 2:3 преку Лука Модриќ и Жуниор Винисиус, па сите помислија дека ќе посведочат на неверојатен комплетен пресврт. Израмнувањето дојде во судиското надполнување кое сепак ВАР го поништи и Шахтар замина дома со трите бода.
Ливерпул победнички се врати од Амстердам и тоа благодарение на автогол. Во 35. минута Садио Мане го бараше Мохамед Салах во домашниот шестнаесетник, но пред него интервенираше Николас Таљафико кој несмасно ја смести топката во сопствената мрежа. Тој гол се покажа како единствен на натпреварот.
Интер не успеа да се поврати од поразот во дербито со Милан и одигра нерешено во Борусија од Менхенгладбах. „Нераѕурите“ поведоа 4 минути по паузата кога Ромелу Лукаку најдобро се снајде во мешаницата пред гостинскиот гол. Во 63. минута гостите добија удар од белата точка откако Артуро Видал го сруши Маркус Тјуран, а Рами Бенсебајни успешно го реализираше. Борусија успеа и да поведе со 1:2 откако на 6 минути пред крајот контрата Флорија Нојхаус ја зачини со перфектна асистенција за Јонас Хофман. Интер се спаси од пораз во 90. минута кога по еден корнер Ромелу Лукаку остана нечуван на втората статива и без проблеми ја затресе мрежата на Јан Зомер.
Порто поведе на гостувањето во Манчестер уште во 14. минута преку Колумбиецот Луис Дијас, но само ги налути „Граѓаните“. Со головите на Серхио Агуеро, Илкај Ѓундоан и Феран Торес домаќините направија целосен пресврт и ги освоија трите бода.
Аталанта продолжи како што и застана. Голеада на гостувањето во Хернинг кај Митјиланд и тоа три гола уште во првиот дел. Дуван Сапата, Папу Гомес и Луис Муриел, како и Алексеј Муранчук пред крајот на натпреварот се погрижија за убедлива победа од 0:4.
Интересен натпревар со два пресврта одиграа Салцбург и московски Локомотив. Гостите поведоа преку Едер, а пред паузата израмни Доминик Собослаи. Набрзо во вториот дел Златко Јунузовиќ донесе водство за австрискиот шампион, а бод за Русите спаси Белорусинот Витал Лисакович.
Благодарение на голот во судиското надполнување постигнат од Египќанецот Кока, грчки Олимпијакос славеше минимална победа над Олимпик Марсеј.