Актерката Шенон Доерти, која ќе остане запаметена по улогата на Бренда Волш во популарната ТВ-серија „Beverly Hills 90210“, конечно се огласи по смртта на нејзиниот колега од серијата Лук Пери.
Пери, кој го играше ликот на Дилан Мекеј во истата серија, почина во понеделник од мозочен удар на 52 години.
Веста за неговата смрт длабоко ги погоди и останатите членови на актерската екипа од серијата што беше најпопуларна во 90-тите, а неговата „голема телевизиска љубов“ Доерти, е целосно „уништена“ од веста.
„Вчера добив телефонски повик што ме уништи. Се борам со оваа загуба и тешко ми е сама со моите мисли. Моето срце е со неговото семејство и пријателите кои беа благословени со неговата светлина, како што бев и јас. Едноставно не можам да го процесирам ова сега“, се огласи Доерти на Instagram.
Двајцата беа една од омилените телевизиски двојки во 90-тите и останаа во пријателски односи и откако си заминаа од сетот.