Прволигашите од Скопје и Струга одбиле на нивните играчи да им бидат направени тестови за коронавирусот бидејќи не веруваат во веродостојноста на истите.
Синдикатот на фудбалери на Македонија извести дека прволигашот од Чаир одбил да дозволи на своите фудбалери и стручен штаб да им се направат тестови за коронавирусот.
„За утре имавме закажано тестирање во ФК Шкупи, меѓутоа во последен момент ни беше откажано од нивна страна со образложување дека тие не веруваат во овие тестови. Го почитуваме нивното мислење, но еве јавно ги замолуваме да направат тестови во друга институција во која веруваат, во интерес на здравјето на фудбалерите“, велат од СФМ.
„Не прифативме да ни се прават тестови во 'Аџибадем Систина' бидејќи тие не се признати од ревелантните институции. Пред неколку дена упативме барање до државната болница и сме во очекување да ни одредат датум за тестирање“, велат од чаирскиот клуб.
Денеска мобилна екипа на „Аџибадем Систина“ зеде примероци од лидерот Вардар чии резултати ќе бидат готови најдоцна до утре.
Тестирање одбил и прволигашот Струга, но навестил дека во сопствена режија ќе направи тестирање во некоја од државните институции.
Од СФМ истакнуваат дека за разлика од некои кои одбиваат тестирање, други клубови сами бараат да им бидат направени тестови. Таков е примерот на виничка Слога. Лидерот во Третата лига Југоисток бидејќи треба да игра бараж натпревар со првиот од Третата лига Центар, екипата на Росоман 83, па поради тоа ќе прави тестирања. Победникот ќе избори пласман во Втората лига Исток.
„За пример на сите треба да ни биде ФК Слога од Виница. Иако ќе играат бараж натпревар за влез во Втора лига, ФК Слога побара од нас да им обезбедиме тестирање. Тестирањето е обезбедено и веќе утре 'Аџибадем Систина' ќе биде во Виница и ќе изврши тестирање во просториите на клубот“, информира СФМ.
Откако во редовите на Ренова и Шкендија тестовите открија влупно шестмина позитивни, очигледно одредени клубови почна ада се сомневаат во веродостојноста на тестовите.
„Во име на СФМ ве замолуваме да не нѐ ставате во никакви комбинации и нечесни игри. До нас допре глас дека сме биле во некаква 'игра' со 'Систина' за некакви нечесни игри. Комбинациите правете си ги на ваша маса со ваши луѓе. Ние секогаш ќе стоиме на страна на фудбалерите, здравјето нивно за нас е најважно. Ако на одредени луѓе во клубовите им е најважен профитот и излезот во Европа, а не здравјето на играчите тогаш сериозно треба да се запрашаат што воопшто бараат во спортот и фудбалот“, вели Синдикатот.
Со оглед на тоа што токму во скопската населба Чаир, од каде што е клубот Шкупи, има многу новозаболени последниве денови, „Гулабите“ најавија дека ги прекинуваат тренинзите сѐ додека не добијат резултати од тестирањето во сопствена режија.
