Среде Милано, онаму каде Италија немаше загубено натпревар, синоќа запре рекордната серија без пораз на „Аѕурите“ кои останаа без финалето од Лигата на нации.
„Црвената фурија“ иако десеткувана одигра феноменален натпревар, а европскиот шампион беше практично непрепознатлив. Подмладената Шпанија од почеток најави дека е решена да го скрши шампионот, и со одлична игра тоа многу умешно го направи.
Во 17. минута Микел Ојарсабал одлично го пронајде Феран Торес во шестнаесетникот, а напаѓачот на Манчестер Сити го отвори резултатот.
Италија не можеше да се соземе, а нервозниот капитен Леонардо Бонучи заработи два жолти картони, првиот за неспортско однесување, вториот за удар со лакт, по што ги остави своите соиграчи со десетмина на терен.
Шпанците тоа го искористија во последните моменти пред паузата кога акцијата на прва од Алонсо преку Сарабиа дојде до фантастичниот Oјарсабал, кој без размислување нафрли до Торес, кој со глава по втор пат го совлада немоќниот Џиџи Донарума.
Со играч помалку очекувано Италија не можеше да се врати од два гола негатива. Во 83. минута се врати мала искра на надеж кога една страшна контра на Федерико Кјеза резултираше со несебично додавање за Лоренцо Пелегрини и гол за 2:1.
По примениот гол Шпанија тотално ја контролираше играше и го заврши натпреварот со победа среде Милано.
Со оваа победа заврши невероjатната серија на Италија од 37 натпревари без пораз, апсолутен светски рекорд кој тешко дека во блиска иднина ќе биде надминат.
Воедно, Италија за прв пат загуби на стадионот „Џузепе Меаца“ во Милано каде во претходните 44 натпревари, почнувајќи од ремито 2:2 со Чехословачка на 20 февруари 1927, имаше само победи и нерешени, без ниту еден пораз.
