Синот на Диего Марадона побара од Барселона да ја повлече десетката која во овој клуб ја носеше неговиот татко, а денес стои на грбот на Лео Меси.
Диефо Синагра побара каталонскиот клуб да го стори тоа, но засега нема најави за такво нешто. Со години дресот со бројот 10 го има Лионел Меси кој викендот направи убав потег за да оддае почит на Марадона. Имено, тој го соблече дресот и под него откри друг дрес, односно десетката која Марадона ја носеше во Њуел'с Олд Бојс.
„Многу ме погоди тој потег. Ова беа многу емотивни денови. Гестот на Лео беше посебен, многу убав. Навистина ме трогна, ме расплака. Потоа и она со Наполи, победата на Химнасија, па она што се случи во Бока Жуниорс, каде беше и Далма. Сите беа емотивни“, рече Диего Синагра говорејќи за Marca.
„Дресот со бројот 10 треба да го повлечат клубовите каде настапуваше. Мислам дека тоа е правилно, вклучително и Барселона. Нема збор за тоа“, изјави тој прашан околу тоа дали бројот на неговиот татко треба да замине во историјата.
Инаку, Аргентина десетката едно време ја повлече од репрезентацијата, по повлекувањето на Марадона во 1994 година, но наиде на проблем кај ФИФА. Имено, според правилата на ФИФА за настап на големите турнири, како на пример Мундијалите, сите препрезентации мора да пријават 23 играчи и тоа со броевите од 1 до 23. Аргентинците сакаа место десеттката да употребуваат 24, но не им беше дозволено.
Од клубовите каде играше Марадона, само Наполи ја има повлечено десетката и тоа уште летото 2000 година. Во Севиља моментално таа стои на грбот на Иван Ракитиќ, Во Бока е кај Карлос Тевес, во Њуелс' е кај Мауро Формика, во Архентинос ја има Дамјан Батажини, а во Барса е кај Меси.