Ракометната федерација на Македонија (РФМ) од денеска до 10 август ќе биде домаќин на Светското првенство за ракометарки до 18 години.
Натпреварите ќе се играат во Скопје, во СЦ „Борис Трајковски“ и СЦ „Јане Сандански“ (и во помошната сала), а влезот за навивачите ќе биде слободен. Целосниот распоред може да се погледне тука.
На турнирот ќе учествуваат 32 репрезентации. Македонската репрезентација ќе игра во групата Б, заедно со Иран, Сенегал и Узбекистан.
Воведниот натпревар „Црвено-жолтите“ ќе го играат вечерва од 20:30 часот против Сенегал, по што ќе следуваат дуелите против Узбекистан, в недела, и против Иран на државниот празник 2 август.
Сите три натпревари од групната фаза македонските ракометарки ќе ги играат во СЦ „Борис Трајковски“ со почеток во 20:30 часот.
Денеска веќе се одиграа два натпревара и тоа Црна Гора - Алжир 38:16 и Хрватска - Египет 31:33, додека Казахстан со службени 10:0 ја доби Индија откако оваа репрезентација не успеа на време да пристигне во Скопје.