Двете римски екипи синоќа забележаа тешки, но значајни победи во натпреварите против Милан и Фиорентина.
Прво Рома на „Олимпико“ го пречека Милан кој продолжува да тоне. Един Џеко во 38-мата минута го отвори резултат, а надеж за „Росонерите“ донесе израмнувачкиот погодок на Тео Ернандес десет минути по паузата.
Сепак, таа надеж траеше прекратко бидејќи само 4 минути подоцна вундеркиндот Николо Ѕаниоло постигна гол кој на крајот се покажа победнички.
Лацио имаше потешка задача од Рома бидејќи гостуваше во Фиренца. Хоакин Кореа донесе водство во 22-рата минута, а шест минути подоцна израмни Федерико Кјеза за ерупција на публиката.
Немаше голови сѐ до крајот кога голгетерот Чиро Имобиле ги замолкна присутните на „Артемио Франки“ со гол во 89-тата минута.
Длабоко со судиското надополнување Лацио доби и пенал откако Лука Раниери играше со рака, но ударот на Фелипе Каиседо беше одбранет од страна на Бартломјеј Дронговски.
По натпреварот, тренерот на Лацио Симоне Инѕаги изјави дека пеналот требало да го шутира Имобиле: „Каиседо е добар изведувач, бевме пред самиот крај, а Имобиле е нашиот специјалист за пенали. Самиот тој реши да шутира па и покрај промашувањето на крајот сепак добро се заврши“.
Со овие победи Рома и Лацио сега имаат по 16 односно 15 бодини и се 5-ти и 6-ти на табелата. Фиорентина е 9-та со 12 бода, додека Милан падна на 12-тото место со само 10.