Стефан Гивар, францускиот фудбалер кој важеше за еден од најефикасните напаѓачи во Европа во 90-тите и кој го освои Мундијалот со Франција во 1998 година, откако се повлече од фудбалот заработува за живот како продавач на базени.
53-годишниот поранешен играч, кој ги закачи копачките во 2002 година, го сврте својот живот како продавач на базени за Tanguy Piscines Bretagne, компанија на негов пријател во неговиот роден град Конкарно во Бретања, на северозападот од Франција.
„Продавам базени веќе 17 години. Газда на компанијата е мој пријател, кој ми кажа дека размислувал да формира оддел за базени и барал претставник за продажба. Бидејќи тогаш бев невработен, му реков дека ќе му помогнам и 17 години подоцна сѐ уште работам со него“, објаснува Гивар за RMC.
Францускиот напаѓач, за кого Њукасл му плати 8 милиони марки на Оксер во 1998 година, признава дека води мирен живот.
„Не мора постојано да барам да бидам пред камера или микрофон за да постојам“, сликовито објасни тој.
За неговиот начин на живот како продавач на базени, Стефан Гивар вели:
„Патувам цел ден, сѐ ми оди многу добро, а навечер се враќам дома“.
Гивар, кој одигра 14 натпревари за Франција, во текот на својата кариера играше за Брест, Генгам, Оксер, Рен, Њукасл Јунајтед и Ренџерс.
По повлекувањето од професионалниот фудбал, во 2008 година дебитираше како тренер во француската аматерска екипа Трегунк, а се појави и како коментатор на Canal+.
Гивар претставуваше голем проблем за коментаторите на Мундијалот 1998 поради неговото необично презиме Guivarc'h. Тоа беше така бидејќи тој е всушност етнички Бретонец, па оттаму и презимето му е бретонско, а не француско. Бретонскиот јазик припаѓа на групата келтски јазици, за разлика од францускиот кој е во групата романски јазици. И самите Французи до ден денес не се сигурни како е правилно, а најчесто го викаат Гивар и Гиварш. На бретонскиот јазик изговорот е Гуиварх.
