Сојузниците на НАТО вчера соопштија дека одлучиле да започнат со повлекување на силите кои се во мисија во Авганистан од 1 мај за да го завршат „за неколку месеци“, се вели во соопштението на Алијансата.
Алијансата ја донесе одлуката на состанокот на министрите за надворешни работи и одбрана во средата вечерта.
„Сојузниците одлучија дека ќе започнеме со повлекување на силите на мисијата ‘Одлучна поддршка’ од 1 мај. Тоа повлекување ќе биде уредно, координирано и промислено. Предвидуваме дека повлекувањето на сите сили на САД и мисијата ќе заврши за неколку месеци“, се вели во соопштението по објавата на американскиот претседател Џо Бајден.
Бајден вчера соопшти дека американските сили ќе почнат да се повлекуваат од Авганистан на 1 мај и процесот ќе биде завршен до 11 септември оваа година, по повод дваесетгодишнината од нападот на кулите близначки во Њујорк.
Датумот 11 септември, 20-годишнината од нападот, не беше споменат во соопштението на НАТО.
„Секој напад на талибанците врз сојузничките трупи за време на повлекувањето ќе биде проследен со енергичен одговор“, предупредува НАТО во соопштението.
„Ние ќе продолжиме да го поддржуваме мировниот процес во Авганистан и ќе ја поддржуваме Истанбулската мировна конференција што ќе се одржи помеѓу 24 април и 4 март, како можност за унапредување на тој процес“, рекоа министрите за надворешни работи на 30 нации по видеоконференцијата на Алијансата.
Земјите кои се најмногу ангажирани во Авганистан се САД, Германија, Турција, Велика Британија и Италија.
Петте земји во операцијата „Одлучна поддршка“ распоредија 6.000 од 9.592 војници од 36 земји-членки на НАТО и партнери како што е Украина.