Хероите кои прават тектонски промени секогаш се издвојуваат од толпата. Токму затоа главните актери на „ТВ Такси 28“ – Ана, Стефан и Стрезо одлучија да ја споделат приказната на првите глувонеми претприемачи во земјава, Радмила и Мартин, кои со нивните вешти раце прават извонредни пици и при тоа рушат бариери.
Во нивната пицерија „Улаф сте“ што се наоѓа во Битола, гостите имаат можност да пробаат превкусни пици, но и да поднаучат знаковен јазик, па со тоа полесно да комуницираат со глувонемите лица, што е еден од чекорите кон понапредна инклузија на лицата со попреченост во нашето општество.
И покрај институционалните и комуникациските препреки, храбрите Мартин и Радмила без задршка го оствариле својот сон и секојдневно работат со цел подобрување на можностите за глувонемите лица.
„Државниот систем нема начин да препознае. Ние сме првата фирма со глуви претприемачи, единствената која се појави. Збунети се, нема некој систем, упорни сме, викаме, а тие ни велеа полека, полека... Храбри сме, не ни е лесно, во иднина ќе видиме, се бориме да има систем“, наведе Мартин.
Неговата цел е да биде инспирација за останатите лица со попреченост да си започнат свои бизниси, и тоа да биде еден од начините да се зголемува инклузивноста.
„Моја препорака е да се стремат кон подобри цели, кон рамноправност, кон достапност, да се поттикнуваат глувите лица да отвораат фирми, да ги имитираат постоечките, да не бидам единствениот“, рече Мартин.
Радмила раскажа за начинот на нивното функционирање со гостите и како ги надминувале препреките за комуникација со нив.
„На почетокот нарачките се правеа преку Viber, се допишувавме со пораки, беше тешко, но успеавме, или лично доаѓаа и сами избираа од менито. Но сега имаме нова апликација за нарачки. Благодарни сме им на групата студенти од државниот факултет кои ни ја подарија оваа интернет алатка, со која може да се направи онлајн нарачка. Ова ќе помогне за развој на бизнисот“, објасни Радмила.
Нивната пицерија е накитена со знаковна азбука, а исто така имаат изготвено и картички со знаковна азбука кои ги подаруваат на гостите кои имаат интерес да научат.
Инклузија во пицерија – вистински пример за тоа како се гради рамноправен свет!
Можете да ја погледнете целата епизода:
