Селекторот на италијанската фудбалска репрезентација, Лучано Спалети, ги кажа своите очекувања за утрешниот натпревар против Англија во квалификациите за Европското првенство 2024.
Италија во саботата во Бари очекувано ја победи Малта со 4:0.
„Важно беше да освоиме три бода без да ризикуваме и лесно да го добиеме натпреварот. Тимот добро се развива. Јасно е дека постои желба подобро да се запознаеме. Игравме добар фудбал. Натпреварот во вторник против Англија на 'Вембли' е еден од оние кои навистина можат да ни помогнат да разбереме какви се нашите шанси во иднина“, изјави Спалети, за официјалната веб-страница на УЕФА.
Репрезентацијата на Италија со 10 бодови е на второто место во групата Ц со три кола до крајот. Малта е последна без освоен бод по шест одиграни натпревари.
Во следниот натпревар избраниците на Лучано Спалети ќе играат на гости против Англија, а Малта ќе ѝ гостува на Украина. Двете средби се играат утре (17 октомври). Ова коло Македонија е слободна и ќе одигра пријателска против Ерменија во Струмица.
Откако во саботата загуби со 2:0 од Украина, македонската репрезентација остана на 7 бода и речиси без шанси за пласман на завршницата.