Фудбалерите на Реал се пласираа во полуфиналето на Лигата на шампионите откако во двомечот од четвртфиналето беа подобри од Челси.
На првиот дуел одигран во Англија беше 3:1 за Реал, додека синоќа во Мадрид по продолженијата беше 3:2 за Челси, па кралевите продолжија со вкупен резултат 5:4.
Челси поведе во 15. минута од натпреварот по добра акција на целиот тим. На крајот Вернер му асистираше на Маунт кој ја смести топката на десната страна од голот за молк на стадионот. И во продолжението од првото полувреме, Челси беше далеку подобар тим, но изостанаа големи шанси.
Сепак, само шест минути игра во продолжението од мечот беа доволни на Челси да го удвои водството. Овојпат Маунт испрати фантастична топка од корнер, а Рудигер најмногу скокна и со глава ја упати топката во мрежата за 0:2.
Реал дури тогаш се разбуди и првата можност ја имаше во 56. минута кога Менди го одбрани ударот на Крос од слободен удар. Шест минути подоцна Алонсо го постигна третиот гол за Челси, но истиот беше поништен бидејќи дефанзивецот на „Сините“ играше со рака пред голот. Оваа ситуација се проверуваше преку ВАР.
Бензема набрзо со глава ја погоди гредата, а лондонскиот тим на 15 минути пред крајот на натпреварот стигна и до третиот гол. Вернер направи голем соло пробив, надмудри неколку играчи на Реал и со малку среќа му донесе голема предност на Челси.
Сепак, славјето на гостите траеше само пет минути откако Родриго намали на 1:3, по неверојатната асистенција на Модриќ, кој го пронајде со одлично додавање од надворешната страна на копачката. Хрватскиот играч за врска можеше да ги нокаутира Англичаните две минути подоцна, но Менди одговори со одлична одбрана.
Пред крајот на регуларниот дел од натпреварот Пулишиќ можеше да го однесе Челси понатаму, но шутираше лошо, па се играа продолженија.
Веќе во првиот дел од продолжението, Реал стигна до злато вредниот гол кој го постигна најдобриот играч на „Кралевите“ Бензема, во негов стил – со глава. Челси залудно напаѓаше до крајот на натпреварот и не успеа да стигне до целта и затоа се збогуваше со одбраната на европската титула.
Од друга страна, Реал во полуфиналето од Лигата на шампионите ќе игра против подобриот од дуелот меѓу Атлетико и Манчестер Сити. Англискиот тим има еден гол предност по првиот натпревар. Првите полуфинални натпревари се закажани за 26 и 27 април, а реваншите ќе се играат на 3 и 4 мај.
Резултат и стрелци:
Реал - Челси 2:3 (Родриго 80', Бензема 96' - Маунт 15', Рудигер 51', Вернер 75')
