Египетските власти ја ограничија продажбата на жолтите елеци кои станаа симбол на социјалното движење во Франција, стравувајќи дека може во земјата да се разгори народен револт како оној во Франција.
– Продажбата на жолти елеци во Египет, што е контролирана од полицијата, веќе не е можна без дозвола, тврдат локалните трговци.
– Продажбата на тие елеци станува поопасна од продажба на дрога, вели анонимен трговец, појаснувајќи дека дошле претставници на службата за национална безбедност и побарале да се запре продажбата.
Во Египет, за секаков вид протести неопходна е дозвола од полицијата.
Гислан Кутар, автомеханичар од Нарбон, стои зад идејата демонстратите во Франција да носат жолти елеци. Кутар е еден од ретките луѓе кој се поврзува со таканаречените „Жолти елеци“, движење кое протестира од ноември поради новите даноци за гориво. Токму тој беше човекот , кој во едно видео, предложи сите демонстранти да добијат жолт елек, објави Deutche Welle.
По бурните настани ширум Франција, претседателот Емануел Макрон вчера имаше обраќање до нацијата. Во 13-минутниот телевизиски говор, осврнувајќи се на барањата на движењето на „жолтите елеци“, францускиот претседател изјави дека прогласува „социјална и економска вонредна состојба“.