Кошаркарите на МЗТ со нов триумф го завршија настапот на турнирот од АБА2 во Златибор, откако денеска го совладаа Борац од Бања Лука со 67:61.
Ова беше трета победа за аеродромци во петтиот меч сезонава во регионалното натпреварување.
МЗТ ја имаше контролата врз играта и резултатот во сите 40 минути, а клучната предност ја обезбеди во третиот период, кој го доби со 30:17. Клучна за триумфот беше серијата од 16:0 со која македонскиот шампион дојде до највисоките на мечот плус 19 (47:28).
Војдан Стојановски одново беше најпрецизен кај МЗТ со 15 поени и 5 асистенции, додека веднаш зад него беа Душан Танасковиќ со 14 поени и 5 скока, Дамјан Стојановски со 11 поени и 7 скока и Ејасу Ворку дабл-дабл учинок од 10 поени и 10 скока.
Составот од Аеродром сега има скор 3-2 во пресрет на третиот турнир следниот месец во Шибеник, каде што ќе ги одмери силите со Подгорица односно Спартак од Суботица.