Компанијата за дијаманти Debswana соопшти дека најден е дијамант од 1.098 карати, што го опиша како трет по големина од ваков вид во светот.
Компанијата му го покажа каменот, кој беше најден на 1 јуни, на претседателот Мокветси Масиси во главниот град Габороне, пишува Guardian.
„Се верува дека е трет по големина дијамант во светот. Редок и извонреден камен, тоа значи толку многу во контекст на дијамантите и Боцвана. Откритието носи надеж за една нација која поминува низ тешки времиња“, рече директорката на Debswana, Линет Амстронг.
Ова е исто така најголемиот дијамант откриен во историјата на компанијата, што претставува заедничко вложување помеѓу владата и глобалниот гигант за дијаманти De Beers.
Најголемиот дијамант на светот е 3.106-каратниот Cullinan, откриен во Јужна Африка во 1905 година. Втор по големина е 1.109-каратниот Lesedi La Rona, откриен во Кароу на североистокот на Боцвана во 2015 година. Боцвана е водечки африкански производител на дијаманти.
