Матиас Погба е обвинет и задржан во притвор заедно со уште четворица под сомнение дека изнудиле пари од неговиот брат Пол Погба, пренесува францускиот AMC Sport.
Обвинителството во Париз официјално поднесе обвинение за изнуда и криминален заговор против Матиас и остатокот од групата, која се состои од лица на возраст од 27 до 36 години.
„Ќе ја обжалиме оваа одлука. Мојот клиент нема врски со криминална организација. Не ја разбираме одлуката на судот да го држи во притвор, особено затоа што тој има алиби за ноќта на наводното киднапирање“, изјави адвокатот на Матиас, Јасин Бузру.
Според истрагата, киднапирањето се случило на 20 март кога група криминалци упаднале во станот на Матиас во Париз, го држеле како заложник, а потоа побарале пари од неговиот брат, кој во тој момент бил во Торино.
Познатиот фудбалер им платил дел од 100.000 евра на киднаперите, но истрагата покрена сомнеж дека Матиас всушност бил главниот актер во режираното киднапирање за да изнуди пари од играчот од средниот ред на Јувентус.
Пол Погба во интервју за полицијата изјави дека верувал дека неговиот брат бил под принуда кога го направил видеото во кое вели дека „ќе ги открие сите тајни за својот брат“.
Видеото послужи како најсилен адут на киднаперите да изнудат пари, а некои француски медиуми пренесуваат дека Матиас на полицијата ѝ потврдил дека видеото го снимил по своја волја.