Дисциплинската комисија на Европската фудбалска унија (УЕФА) го казни Фудбалскиот сојуз на Босна и Херцеговина поради однесувањето на навивачите на натпреварите против Лихтенштајн и Португалија во квалификациите за ЕУРО 2024.
УЕФА го казни Фудбалскиот сојуз на Босна и Херцеговина со вкупно 66.000 евра, делумно затворање на стадионот за следниот натпревар на домашен терен и забрана за продажба на билети на навивачите за нивниот следен натпревар на гости.
Контролното, етичкото и дисциплинското тело на УЕФА ја казни Босна и Херцеговина со 20.000 евра и нареди делумно затворање на стадионот за следниот домашен натпревар поради дискриминаторско однесување на нивните навивачи за време на натпреварот против Португалија.
Тие се казнети и со 26.000 евра поради блокирање на скалите, фрлање предмети и упад на теренот на натпреварот против португалската репрезентација. Да потсетиме, за време на натпреварот еден навивач истрча на теренот бидејќи сакаше да се фотографира со Кристијано Роналдо.
Босна и Херцеговина, исто така, беше казнета со 20.000 евра и забрана за продажба на билети на навивачите за нивниот следен натпревар на гости, поради употреба на пиротехника за време на натпреварот во Лихтенштајн на 13 октомври.
Популарните „Змајеви“ во ноемврискиот прозорец прво на 16-ти ќе играат на гости против Луксембург, а потоа на 19-ти во Зеница ја пречекуваат Словачка.