Европската куќа на фудбалот покрена дисциплинска постапка против Арсенал и Келн, откако вчера германските навивачи направија неред на стадионот „Емирати“.
Стартот на вчерашниот натпревар од рамките на Лигата на Европа помеѓу Арсенал и Келн беше одложен за еден час подоцна, бидејќи полицијата и обезбедувањето имаа проблем со навивачите кои пробаа насилно и без карти да влезат на стадионот.
Арсенал е обвинет поради неодговорност и неспремност при обезбедување на трибините, додека Келн е обвинет за дури четири нерегуларности и тоа: некоректно однесување на публиката, носење и палење на факли, фрлање предмети на теренот и предизвикување штета на стадионот.
Сите пет обвиненија ќе бидат ставени на проценка и ќе се очекува пресуда на состанокот на Дисциплинарното тело на УЕФА, кое ќе се сретне на 21 септември.