Иако е чест посетител на фудбалските терени, Џани Инфантино го немавме видено како игра фудбал - сѐ до пред неколку дена кога на сите им покажа со какви (не)фудбалски вештини располага.
Првиот човек на ФИФА, Џани Инфантино, учествуваше на еден хуманитарен натпревар за време на Мундијалот во Катар. Камерите не ги уловија сите негови вештини со топката, но го уловија изведувањето корнер. И тоа е - верувајте - доволно.
Прво Инфантино зеде залет небаре ќе шутира слободен удар од 30 метри, топката ја удри на страшно нефудбалски начин со ногата речиси под прав агол, па од корнерот неговата екипа не виде ништо. Топката не само што не отиде пред противничкиот гол, туку уште на почеток излезе од терен во гол-аут.
Како ли само успеа ногата да ја крене толку високо?
Нормално, видеото стана вирално на социјалните мрежи каде сите му се смеат на Инфантино и неговите фудбалски вештини.
„Нема да претерувам ако речам дека ова е најлошата техника која некогаш сум ја видел“, „Човек кој вака изведува корнер не смее да биде ни блиску до фудбал, а не па да стои на неговото чело“, „Дали овој човек некогаш воопшто играл фудбал“, се само некои од коментарите на социјалните мрежи.