Автомобилската индустрија масовно се врти кон електрификација на постоечките модели и создавање нови хибридни или целосно електрични возила за клиентите кои се сѐ повеќе еколошки освестени.
На зголемениот број автомобилски компании кои најавија дека наскоро завршуваат со продажба на автомобили со мотори со внатрешно согорување и се фокусираат на електрификација, наскоро треба да им се придружи уште една - MINI.
MINI ќе го претстави својот последен автомобил со бензински мотор во 2025 година, а по 2030 година веќе нема да нуди возила со мотори со внатрешно согорување.
Според планот, кој сè уште не е официјално потврден, а до кој стигнаа германските медиуми, MINI ќе стане првиот бренд на групацијата BMW што најавува целосна електрификација.
Што се однесува до очекувањата за продажба, компанијата најавува дека до 2027 година, половина од продадените автомобили ќе имаат електрични мотори, а по 2030 година веќе нема да може да се купуваат бензинци MINI, освен половни.
Денес на пазарот е достапен само еден електричен модел од овој бренд - Cooper SE, а плановите на компанијата вклучуваат два електрични кросовери, додека неодамна го претстави концептот на автономно електрично комби.
Секако, што се однесува до овој концепт, не е познато дали MINI навистина ќе претстави и производен модел.
Според веб-страницата Electrek, бидејќи MINI практично нуди само три модели (кои се достапни во различни верзии) - Cooper, Clubman и Countryman, за нив процесот на електрификација треба да биде поедноставен и побрз во споредба со брендовите кои во понудата имаат повеќе модели кои ќе треба да бидат електрифицирани.
Слични планови како MINI, кои вклучуваат целосно префрлање на електрични мотори до крајот на оваа деценија или порано, соопштија Volvo, Jaguar, Bentley и други големи автомобилски компании.