Мечот меѓу светскиот шампион во тешка категорија, Украинецот Олександр Усик и Британецот Ентони Џошуа веројатно ќе се одржи кон крајот на јуни, а како место за одржување на борбата се разгледува Саудиска Арабија, пишува Sky Sport.
Усик во септември минатата година го победи Џошуа и ги освои појасите WBA, WBO, IBF и IBO. По руската инвазија на Украина, Усик се врати во татковината за да учествува во одбрана на земјата. Тоа предизвика сомнежи во можноста за организација на реванш со Џошуа.
Но, ESPN минатата недела извести дека до борба меѓу нив двајца ќе дојде ова лето, откако украинскиот министер за спорт му даде дозвола на Усик да ја напушти земјата.
„Моментално разговараме за Саудиска Арабија“, изјави промоторот на Усик, Александр Красјук за Sky Sport. „Крајот на јуни е времето кое засега го разгледуваме. Добра работа е што Усик веќе е во Европа за да ги започне подготовките“.
Победникот од овој меч ќе се бори за WBC појасот против Британецот Тајсон Фјури.