По драматичните моменти во Русија откако шефот на Вагнер објави бунт против руското раководство и ги поведе борците кон Москва, во вечерните часови ситуацијата се смири кога Јевгениј Пригожин објави дека неговите војници ќе го запрат движењето кон Москва „за да не се излее Руска крв“.
Претседателот на Белорусија, Александар Лукашенко, разговараше со Пригожин и како резултат на преговорите што траеја цел ден, Пригожин се согласи да ја деескалира ситуацијата.
Прес-службата на Лукашенко соопшти дека преговорите се воделе во договор со рускиот претседател Владимир Путин.
„Пригожин се согласи да го прекине маршот кон Москва и да преземе чекори за деескалација на ситуацијата“, се вели во соопштението.
Како дел од договорот, борците на Вагнер ќе добијат безбедносни гаранции, пишува BBC.
Што друго му било понудено на Пригожин и неговите платеници не е познато.
Во меѓувреме, од Минск беше соопштено дека рускиот претседател Владимир Путин и Лукашенко разговарале за преговорите и дека рускиот лидер му се заблагодарил на својот белоруски колега за ангажманот.
