Откако го врати голманот Гачевски, Вардар сега е блиску до потпис и со уште еден повратник - играчот од дефанзивната средина Дарко Мицевски.
По едногодишна авантура во Латвија, 29-годишниот Мицевски се враќа во татковината и тоа во Вардар, клубот каде последно настапуваше. Трансферот сѐ уште не е потврден од македонскиот второлигаш, но според речиси сите спортски портали во земјава - тој е извесно дека ќе се реализира.
Мицевски во Вардар настапуваше од летото 2018 до јануари лани кога замина во латвискиот прволигаш РФС, напуштајќи го бродот кој тонеше. Вардар потоа испадна од Правта лига, па сега ќе му помага да се врати во елитата.
Претходно, Вардар го врати и голманот Филип Гачевски откако тој се раздели со кипарскиот клуб.
Мицевски е скопско дете кое кариерата ја почна во младинските погони токму на Вардар. Во земјава настапуваше и за Работнички и Тетекс, а во странство за Слобода од Ужице, ОФК Београд и Нови Пазар во соседна Србија, како и за белоруски Минск и либански Неџме.
Вардар зимава се обидува да се засили за да успее во мисијата да се врати во 1.МФЛ. На полусезона е на 3. место во 2.МФЛ Запад со заостанување од 12 бода зад лидерот Силекс и 3 бода зад второпласираната Воска Спорт. Само првиот обезбедува пласман во елитата, додека вториот ќе игра бараж против прволигаш.
Сезоната во второлигашката конкуренција продолжува на 19 февруари кога Вардар му гостува на Охрид Лихнидос.