Гоце Седлоски повеќе не е тренер на Вардар, откако вчера поднесе оставка на функцијата. Како причини за оставка Седлоски ги наведе поразите од Копенхаген, по кој Вардар испадна од Лигата на шампионите и Шкендија во рамките на првото коло во домашното првенство.
„Тие два порази ме погодија многу бидејќи јас како човек не сум навикнат да губам, но и фудбалскиот клуб Вардар не е навикнат на порази. Горд сум на постигнатото. Успеавме да освоиме две титули во две години, а горд сум и на победата над Малме и пласманот во третото квалификациско коло од Лигата на шампионите, како и домашната победа со Копенхаген“, стои меѓу другото во соопштението со кое Седлоски ја поднесе оставката.
Вардар утре ќе го одигра првиот натпревар од плејофот во Лига Европа против Фенербахче, а најверојатно тимот ќе го води помошникот на Седлоски, Александар Васовски.
Што се однесува до наследникот на Седлоски, јавноста шпекулира со името на поранешниот селектор на Македонија, Чедомир Јаневски.