Тимот од Бремен во двата бараж натпревари одигра нерешено со второлигашот Хајденхајм, но поради правилото за гол на гости излезе како победник од дуелот и избегна испаѓање.
Вердер заврши трет од позади на Бундеслигата и се соочи со два натпревара кои значеа опстанок или испаѓање. За противник го имаше тимот на Хајденхајм кој заврши третопласиран во 2.Бундеслига и имаше за цел првпат да се избори за пласман во најдобрата германска лига.
Откако првиот натпревар во Бремен заврши без голови, синоќешниот реванш беше тотално спротивен. Уште во 3. минута домаќините си го урнаа сонот откако Норман Тојекауф ја затресе сопствената мрежа упатувајќи удар со кој веројатно сакаше да ја расчисти опасноста.
Надеж за Хајденхајм донесе Тим Клајндинст кој на 5 минути до крајот израмни на 1:1. Но, домаќините наместо да постигнат гол за водство, примија гол откако во 4. минута од надополнувањето Лудвиг Аугустинсон донесе опстанок за Вердер. Некоја минута подоцна Клајндинст од белата точка ги постави конечните 2:2, реми кое за неговиот тим не значи ништо освен избегнат пораз.
Со опстанокот Вердер останува клуб со најмногу сезони во Бундеслигата. За тимот од Бремен наредната сезона ќе биде вкупно 57, со што и натаму ќе има една повеќе од Баерн. Вердер само еднаш играл во втората лига, во сезоната 1980/81.