Египетските археолози најавија уште возбудливи откритија откако деновиве пронајдоа 13 одлично сочувани дрвени ковчези.
Министерството за туризам и антиквитети на Египет го потврди пронајденото истакнувајќи дека иако се работи за дрвени саркофази стари најмалку 2.500 години, сите се во одлична состојба. Сите се запечатени и не покажуваат знаци дека биле отворени било кога по првичното затворање.
На прес-конференција закажана специјално по повод откритието, на јавноста ѝ беше соопштено дека гробницата била откриена во пустинската некропола Сакара и тоа 11 метри под површината. Дрвените саркофази биле запечатени и во голем дел нечепнати, а некои сѐ уште ја имале сочувано и оригиналната боја на дрвото.
Според Халед Ел-Енани, Министерот за туризам и антиквитети, пронајдени биле три запечаните одаи, а археолозите очекуваат уиште нови откритија токму на истото место при наредните ископувања.
Со оглед на одлично сочуваните гробници, археолозите со оптимизам очекуваат да пронајдат и разни скапоцености. Разните предмети и накит би им помогнале во откривањето на статусот на погребаните, додека идентитетот веројатно би останал мистерија.
Египет ги отвори вратите на музеите на 1 септември. Со продолжувањето на археолошките ископувања Египќаните се надеваат дека повторно ќе ги вратат туристите кои поради пандемијата со коронавирусот сега ги има во многу мал број.