Речиси секој втор жител на Европската Унија вели дека никогаш не вежба или спортува, покажува новото истражување спроведено меѓу испитаниците кои живеат во земјите-членки на ЕУ.
Според истражувањето на Евробарометар на ЕУ, бројот на оние кои не вежбаат е зголемен на 45 отсто во споредба со 2009 година, кога 39 отсто од испитаниците одговориле дека не вежбаат. Дополнително, речиси секој петти испитаник или 17 отсто одговориле дека вежбаат помалку од трипати месечно.
Вкупно 32 отсто од жителите на ЕУ вежбаат најмалку еднаш неделно, а само 6 отсто вежбаат најмалку петпати неделно.
Забележана е и географска разлика меѓу испитаниците и склоност кон секаков вид вежбање.
Учесниците во истражувањето кои живеат во северните земји-членки на ЕУ се поактивни вежбачи.
Истражувањето покажа дека вежбаат 71 отсто од Финците, 63 отсто од Луксембуржаните и 60 отсто од Холанѓаните.
Анкетата, исто така, покажа дека 73 отсто од Португалците, 68 отсто од Грците и 65 отсто од Полјаците не се занимаваат со физичка активност и веројатно никогаш нема да се занимаваат.
Студијата покажа дека физички активните жители на Европа се претежно вработени, добро образовани и финансиски стабилни мажи.
Поразителен е фактот дека дури 49 отсто од жените никогаш не вежбаат, наспроти 40 отсто од машките испитаници.
Само 13 отсто од луѓето кои го напуштиле училиштето на 15-годишна возраст (или дури и помлади) вежбаат најмалку еднаш неделно, во споредба со 42 отсто од оние кои го продолжиле своето образование до најмалку 20-годишна возраст или подолго.
Само 22 отсто од невработените испитаници вежбаат најмалку еднаш неделно во споредба со 45 отсто од менаџерите кои редовно вежбаат еднаш неделно.
Истражувањето покажа дека е помала веројатноста посиромашните луѓе, кои имаат потешкотии да ги платат основните сметки за живот (околу 20 проценти од нив), редовно да вежбаат секоја недела во споредба со оние кои немаат такви финансиски потешкотии или речиси никогаш не се среќаваат со нив (36 проценти).
Недостатокот на време е главната причина што ја наведоа испитаниците за да го оправдаат фактот дека не вежбаат (41 отсто), а потоа следи недостатокот на мотивација или интерес (25 отсто).
За време на пандемијата на COVID-19, една третина или околу 34 отсто од испитаниците вежбале поретко, 18 отсто целосно престанале да вежбаат, 34 отсто продолжиле со физичка активност со исто темпо, а 9 отсто го зголемиле бројот на тренинзи.
