Археолози тврдат дека пронашле добро сочувани зачини - од шафран и зрна бибер до ѓумбир - во остатоците на бродот Gribshunden кој потонал пред 500 години, а кој му припаѓал на кралот Ханс, како тогашен крал на Данска и Норвешка.
Во 1495 година бродот потонал во Балтичкото Море, во близина на брегот на шведскиот град Ронеби. Се верува дека потонал откако на него избувнал пожар, и тоа додека кралот одел на политички состанок во Шведска.
Спортски нуркачи го пронашле потонатиот брод во 60-тите години на минатиот век, а во последниве години беше спорадично истражуван. Во текот на претходните истраги биле пронајдени големи предмети, како дрвени скулптури, за кои екипажот верувал дека го штитат од несреќи
Истражувањето, предводено од археологот Брендан Фоли од шведскиот Универзитет Лунд, открило зачини кои биле под калта.
„Балтикот е чуден - има ниско ниво на кислород, ниска температура, ниска соленост, толку многу органски работи се добро сочувани, што не би било случај во ниту еден друг океан во светот. Но, да се најдат вакви зачини е сосема невообичаено“, вели Фоли.
Зачините биле симбол на висок статус, бидејќи само богатите можеле да си дозволат шафран или каранфилче, кои биле увезувани надвор од Европа. Истражувачот од Универзитетот Лунд, Микаел Ларсон, истакна дека ова е уникатно археолошко откритие, пренесува Reuters.
