ФФМ во соработка со УЕФА започна со изградба на фудбалски терен со вештачка трева во комплексот на Горан Пандев во Струмица кој треба да биде најмодерниот во земјава.
Се работи за проект како дел од „Hat Trick III“ програмата на УЕФА за подобрување на инфраструктурата на земјите во развој. Вештачката трева која ќе биде поставена во Струмица ќе биде од најновата генерација без оние ситни гумички.
„Сите ние сме исклучително благодарни за посветеноста на Горан Пандев кон македонскиот фудбал, како и неговото вложување во младите таленти, академијата и придонесот во развојот на нашиот фудбал. Изградбата на терен со вештачка трева за потребите на Академија Пандев е еден вид признание од соработниците и институцијата која го води нашиот фудбал кон тоа што Горан и Академија Пандев инфраструктурно го изградија во Струмица“, вели генералниот секретар на ФФМ, Филип Поповски.
„Инвестициите од овој тип се клучни за развојот на фудбалот, а ние во Фудбалската федерација на Македонија сме подготвени позитивните искуства да ги претвориме во долгорочна соработка со сите поврзани субјекти, во правец на создавање на услови за развој на фудбалот, почнувајќи од најмладите категории, па сѐ до професионалниот фудбал“, завршува тој.
Во моментов се врши реновирање на стадионите во Прилеп, Битола, Кавадарци, Чаир и Џепчиште, а наскоро ќе почнат работите и во Штип.
Фото: ФФМ
