Астрономите се воодушевени од вртлог што се појави во близина на северниот пол на нашето Сонце, но сè уште нема објаснување за неговото потекло.
Сонцето не престанува да нè изненадува, а најновиот пример за тоа е неверојатниот сончев вртлог забележан од научниците на НАСА. Оваа необична глетка е резултат на плазмата на Сонцето, која се одвоила од површината и потоа како торнадо се вртеше околу северниот пол на нашата ѕвезда, оставајќи ги научниците зачудени.
Овој неверојатен настан го посочи Тамита Сков, научник за истражување во непрофитната корпорација Aerospace и наградуван едукатор, која на својот Twitter профил сподели видео од опсерваторијата Solar Dynamic на НАСА.
Самиот вртлог се појави над географската широчина на Сонцето од 55 степени, но ова не е првпат научната заедница да го забележи овој редок феномен. Скот Мекинтош, соларен физичар и заменик-директор во Националниот центар за атмосферски истражувања, рече дека сончевиот вртлог се појавува на истото место за време на секој сончев циклус. Сепак, ова е првпат астрономите да видат вртлог од ваков калибар, што збуни многумина во научната заедница.
Сонцето следи 11-годишен циклус на активност, а според Мекинтош, вртлогот се појавувал на околу 55 степени географска широчина за време на секој сончев циклус откако биле направени набљудувања на нашата ѕвезда. Иако сè уште нема објаснување зошто се појавува, астрономите веруваат дека овој феномен е поврзан со начинот на кој Сонцето го менува своето магнетно поле.
Мекинтош вели дека многу астрономи се прашуваат зошто вртлогот се појавува на тоа место, потоа се движи кон полот и исчезнува, повторувајќи го овој процес на секои неколку години, но сè уште нема одговор.
Сепак, се надеваме дека претстојните проекти, како што е Solar Orbiter што ќе го лансира Европската вселенска агенција, ќе им помогнат на научниците подобро да го разберат овој феномен, бидејќи разбирањето на сончевата активност може да нè заштити од исклучително опасни соларни бури.
