Македонскиот куп-освојувач, тимот на ТФТ го претрпе вториот пораз во регионалната АБА2 лига.
Тимот од скопско Тафталиџе вечерва загуби од Сутјеска со 99:69 во второто коло од турнирот што се одржува во Златибор, Србија.
Победникот се наѕираше веќе на полувремето, бидејќи црногорскиот претставник имаше водство од 41:25.
Слично како и во првото коло кога ТФТ загуби од Пелистер, избраниците на тренерот Боро Смилковски се прикажаа во бледо издание и далеку од формата што тимот ја покажуваше мината сезона.
Само Американците Дупри МекБраер со 16 и Џермеин Бишоп со 10 поени беа двоцифрени, додека кај победникот се истакнаа Милош Копривница со 27, Владимир Томашевиќ со 19 и Милош Поповиќ со 17 поени.
Вториот македонски претставник во ова натпреварување, битолски Пелистер, вечерва од 21 часот ќе се соочи со Шенчур.