Имаме договор кој го потпишавме со Pfizer кога нарачавме голема количина вакцини. Всушност направивме билатерален договор со Pfizer согласно кој немавме право на никаков начин да ги оттуѓуваме вакцините. Токму тоа беше причината што доцни примопредавањето на вакцините, порача денеска српскиот претседател Александар Вучиќ на граничниот премин Прешево-Табановце.
-Ние не можевме да ги донесеме сите вакцини, бидејќи сите земји, а и некои фирми работат на заштита на своите производи. Затоа моравме на Pfizer да му дадеме посебни гаранции дека ќе му го гарантираме начинот на транспорт на вакцините и дека вакцините ќе бидат исти како кога ние ги презедовме, рече Вучиќ во одговор на прашање по примопредавањето на 4.800 од предвидените 8.000 вакцини на Pfizer против COVID-19.
Има и земји, посочи, кои водат геополитички прашања на таков начин што велат ние сме тие кои одлучуваме. Не може Србија, ако добро се снашла, да одлучува каде ќе ги дава. Токму тоа беше проблемот во договорот поради што доцнат вакцините.
-Мене денеска ни малку не ми одговараше да доаѓам тука, но синоќа видовме дека ги завршивме сите процедури и веднаш се слушнавме со премиерот Заев и реков ајде да се сретнеме за луѓето што побрзо да ги добијат вакцините, бидејќи не им е грижа дали мене ми се доаѓа или не ми се доаѓа денеска. Така што навистина побрзавме и дадовме сѐ од себе и тргнавме накај границата за да стигнеме навреме веднаш кога добивме дозвола, потенцира Вучиќ.
„Јас смрзнав, па затоа ќе бидам краток“, рече Вучиќ и додаде дека е среќен што ѝ подариле вакцини на Северна Македонија.
Премиерот Зоран Заев примопредавањето на вакцините го оцени како чин на огромна солидарност, пријателство и прва помош од братскиот српски народ кон македонскиот народ и искрен чин на пријателство.
-Иницијативата е на претседателот Вучиќ со кој редовно имаме комуникација и сакам да му се заблагодарам и на него и на премиерката Брнабиќ и на сите луѓе кои работеа сите овие денови. Веројатно првпат се случува да се добие една ваква согласност од Pfizer која веројатно ќе значи многу помош насекаде во светот преку вакви акти на солидарност, рече Заев.
Ова, додаде, е првата пратка, а овие денови ќе стигнат и останатите вакцини.
-Многу е важно што првите вакцини во нашата земја стигнаа токму од братска и пријателска Србија и што ќе ги покријат сите здравствени работници – лекари, медицински сестри и сите што работа во ковид центрите ширум земјава, потенцира премиерот.
Нагласи дека границите со Србија се отворени поради иницијативата што постои во Западен Балкан за зголемување и унапредување на регионалната соработка што некои ја викаат „мини Шенген“.
-Како и да ја викаат тоа е израз на пријателство и соработка. На 24 февруари со претседателот Вучиќ и премиерот Еди Рама ќе потпишеме договори и меморадуми во повеќе области за меѓусебно помагање. Нашата соработка расте, а тоа треба да го знаат и македонскиот и српскиот народ затоа што работиме за да биде подобро за двата народи, истакна Заев.