„Денеска ја одбележуваме 78-годишнината од депортацијата на нашите сограѓани, македонските Евреи, во нацистичките логори на смртта. Оваа трагедија е длабоко врежана во колективната меморија на македонските граѓани и ги испиша едни од најмрачните страници во историјата“, вели македонскиот премиер.
Зоран Заев преку статус на Facebook профил го одбележа 11 март, денот на депортацијата на македонските Евреи од страна на бугарските и германските фашистички и нацистички окупатори за време на Втората светска војна.
„Со сеќавањето на жртвите од овој ужасен злочин со кој 7.144 македонски Евреи беа погубени во логорот Треблинка, и кога им оддаваме помен и на останатите шест милиони невини еврејски мажи, жени и деца, се соочуваме со последиците на ова ѕверство и жалиме за сите семејства кои беа погубени, жалиме за роднините, жалиме за соседите, жалиме за целата еврејска заедница во нашата земја“, пишува тој.
„Нашата обврска, на секој од нас, е засекогаш да остане запаметен овој антицивилизациски акт со сиот негов ужас, како предупредување и лекција од минатото. Лекција која добро треба да се знае за предвреме да се пресретнат сите форми на зло и сите опасности, кои на било каков начин можат да ја засенат нашата заедничка иднина и градењето на еднакво општество за сите.
Холокаустот е најголемото злосторство во современата историја на човештвото, а сеќавањата на жртвите секогаш ќе биде наша должност – Никогаш повеќе да не се повтори!“, завршува премиерот.
Денеска ја одбележуваме 78-годишнината од депортацијата на нашите сограѓани, македонските Евреи, во нацистичките логори...
Posted by Zoran Zaev on Thursday, March 11, 2021