Ако може да се суди според зборовите на еден од водечките научници од тимот што ја произведе вакцината на AstraZeneca, поради критиките што доаѓаат од ЕУ, цената на таа вакцина може да се зголеми, пишува Индекс.хр.
Џон Бел, канадски имунолог и генетичар и професор на Оксфорд, кој беше еден од клучните научници во развојот на вакцината на AstraZeneca, во интервју за британски Телеграф рече дека AstraZeneca може да ја доведе во прашање претходната одлука да не профитира од вакцината, поради критиките од Европската унија.
Тој тврди дека на AstraZeneca никогаш не и било одадено признание за одлуката да не заработи пари од вакцината, додавајќи дека неодамнешните напади што доаѓаат од водечките политичари во ЕУ ја доведуваат во прашање таквата одлука.
– Има момент кога AstraZeneca може да каже: „сега ќе престанеме да наплаќаме ниска цена затоа што не ни оддавате признание за сè што направивме“. Цената на акциите на AstraZeneca падна, не се зголеми. Произведуваме повеќе вакцини од кој било друг. Се работи за сигурна и ефикасна вакцина, а на никого не му е грижа, рече Бел.
Тој нагласи дека во AstraZeneca има фрустрација затоа што се откажува од профитот на вакцината, што не е случај за ривалите како што е Pfizer.
– Немам проблем со тоа луѓето да заработуваат, но сега не е време за тоа. Фармацевтската индустрија ни порачува: „Погледнете не, бевме одлични и го спасивме светот. Да, така е, но исто така заработивте многу пари, истакна професорот.
Изјавите на Бел, пишува Телеграф, доаѓаат во време кога и во AstraZeneca интерно се дискутира дали британско-шведската компанија треба да наплаќа повеќе за својата вакцина.
Компанијата AstraZeneca ги коментираше изјавите на водечкиот научник од Оксфорд.
– Од самиот почеток, пристапот на AstraZeneca е да се третира развојот на вакцините како одговор на вонредната глобална закана по здравјето и ќе продолжи да работи во истиот дух. Апсолутно сме посветени да обезбедиме вакцини во што е можно повеќе земји и при тоа да не заработиме ништо. Компанијата вети дека ќе ја продава вакцината по цена која доволна само за покривање на трошоците за време на пандемијата, рече портпаролот на AstraZeneca.
