Војската на Молдавија соопшти дека е поставен експлозив во складиштата за оружје низ отцепениот регион Приднестровие.
Поранешен воен инспектор при Министерството за одбрана на Молдавија објави дека оружените сили на Приднестровие поставиле експлозиви во сите складишта за оружје во овој сецесионистички молдавски регион, вклучително и складиштето за муниција Кобасна. Ова значи дека доколку започне било каква воена операција ќе поредизвика катастрофална штета во делови на Молдавија, Приднестровие и соседна Украина.
Складиштето за муниција Кобасна е најголемо во Источна Европа и содржи 20.000 тони оружје и муниција од советско време. Се верува дека го чуваат околу 1.500 руски војници. Уште од почетокот на воениот судир на Русија со Украина во Молдавија расте загриженоста за складиштето за муниција Кобасна, а некои веруваат дека тамошното оружје би можело да се употреби во потенцијален иден воен судир.
Покрај тоа, Академијата на науки на Молдавија утврдила дека евентуалната експлозија на оружјето кое се наоѓа во складиштето за муниција, а на кое одамна му е поминат рокот за употреба, би била еквивалентна на атомските бомби од Хирошима и Нагасаки. Загриженоста за таков настан се зголеми по аксплозијата во Бејрут во 2020 година.
Приднестровие е автономна покраина во составот на Молдавија, де факто независна територија од Молдавија од 2 септември 1990 година, која се наоѓа на левата страна од реката Днестар, со главен град Тираспол. Со исклучок на неколку села, Молдавија нема никаква контрола врз територијата на Приднестровие, позната и како Транснистрија, Трансднестар и Трансднестрија. Приднестровие е уредена како претседателска република и има свој устав. Според уставот службени јазици се молдавскиот (на кирилица), рускиот и украинскиот. Населението го сочуваат Руси, Молдавци и Украинци, речиси еднакво поделени на третини.
На меѓународно ниво ниту една суверена држава не ја има признато независноста на Приднестровие, дури ни Русија. Само три други отцепени и непризнати држави ја имаат признаено, во договор за меѓусебно признавање: Абхазија, Јужна Осетија и Арцах (Нагорно-Карабах).
