Шест научници на НАСА кои од јануари живееја во изолација на Хаваите, во услови како оние на Марс, вчера излегоа од изолација.
Екипажот од четворица мажи и две жени беше дел од проект чија цел е да се испитаат психолошките последици од вселенските мисии на астронаутите.
„Навистина е задоволство тоа што знаеме дека сознанијата од оваа и мисии слични на оваа ќе помогнат да се подобрат идните истражувања на Марс и истражувањата на вселената воопшто“, рече Семјуел Пејлор, научник на НАСА.
Врз основа на информациите до кои дојде НАСА, во иднина ќе се прави селекција на поединци и групи со соодветни особини, подготвени да се соочат со стресот, изолацијата и опасностите што им претстојат во двегодишната или тригодишната мисија на Марс.
НАСА се надева дека ќе успее да испрати експедиција на Марс до 2030 година.
Експерименталниот екипаж беше сместен во подножјето на Мануа Лоа, најголемиот активен вулкан на Земјата.
Кога и да требаше да излезат од нивниот мал дом, тие носеа вселенски одела, а се хранеа исклучиво со замрзната и конзервирана храна.
Екипажот имаше задача да спроведи геолошки истражувања, да ги запишува на мапа и да го одржува живеалиштето како да е на Марс.
Имале две спални соби, кујна, лабораторија и една бања.
За време на нивниот престој во изолација им биле мерени компатибилноста и нивото на стрес. Исто така воделе евиденција за тоа како се чувтвуваат. Во тоа им помагале специјално дизајнирани сензори.
Во истражувањето исто така било тестирано кој е најдобриот начин да му се помогне на екипажот да се справи со стресот.
Кога биле преокупирани, со помош на уреди што поддржуваат технологија за виртуелна реалност, можеле да се „опуштат“ со „престој“ на некое тропско место или некоја убава плажа.