Кристијан Ѕакардо откри дека Милан и Јувентус биле меѓу силно заинтересираните клубови за потписот на грузискиот бисер Хвича Кварацхелија, но сепак одлучиле против неговиот потпис.
Грузискиот репрезентативец летоска дојде во Наполи за 10 милиони евра и веќе направи огромен удар во Серија А и во Лигата на шампионите, а навивачите од Неапол веќе лудуваат по него и го сметаат за нова ѕвезда. Воедно, неговата вредност досега се искачи на 35 милиони евра.
Но, патот на Хвича во Калчото можел да биде многу поинаков бидејќи по неговиот потпис трчале и гигантите Милан и Јувентус. За интересот на овие два клуба сведочи Кристијан Ѕакардо, поранешниот фудбалер кој стана светски шампион со Италија во 2006 и кој посредувал за неговиот трансфер во Наполи.
„Ги пратев преговорите со Наполи и имав чувство дека другите (Милан и Јуве, заб. на прев.) се сметаа за задоволни со Леау и Кјеза“, изјави Ѕакардо.
Мамука Џугели, агентот на Кварацхелија, уште во август потврди дека „Бјанконерите“ го следеле 21-годишниот Грузиец и тоа подолго време, едно време дури и биле во преговори со неговиот поранешен клуб Рубин, но не ги продолжиле преговорите откако Фабио Паратичи си замина од клубот летото 2021 година.
Рафаел Леау, кој е две години постар од Кварацхелија, игра одлично за Милан постигнувајќи 4 гола и 7 асистенции во сите натпреварувања сезонава. А, пак, Федерико Кјеза кон крајот на месецов ќе наполни 25 години и се очекува наскоро да се врати на теренот по долгата пауза поради тешката повреда на коленото на почетокот од годинава.
Кварацхелија на 8 натпревари во Серија А постигна 5 гола и направи 2 асистенции, а во Лигата на шампиони постигна 1 гол и 2 асистенции во трите кола. Учествуваше и во акциите во многу други голови за Наполи. За Грузија има 10 гола на 19 натпревари, а месецов ѝ даде гол и на Македонија на оној натпревар од Лигата на нации во Тбилиси кој неговата репрезентација го доби со 2:0.
