Трансфер на играч од Реал Мадрид во Барселона одамна не се случил, а тоа сценарио изгледа ќе го видиме во блиска иднина.
Како што пишуваат шпанските медиуми, ѕвездата на Реал, Марко Асенсио се одлучил за шокантен трансфер и заминување во Барселона.
Шпанските медиуми веќе со денови „зујат“ за овој трансфер, а угледното Радио Каталуња синоќа ја објави веста дека 26-годишниот Асенсио веќе потпишал преддоговор со Барселона.
Шпанскиот интернационалец има договор со Реал до крајот на сезоната, што значи дека на 1 јануари ќе може да потпише договор со клубот во кој ќе ја продолжи кариерата на 1 јули.
Асенсио на почетокот на месецот во интервју изјави дека „не може да тврди дека нема да игра за Барселона“, што дополнително ја заинтригира шпанската јавност.
Но, она што е уште поинтересно е што Асенсио е голем фан на Барселона иако се обидува тоа да го сокрие.
Сепак, беа „ископани“ неговите твитови од 2011 година кога ја прослави титулата на Барселона.
Тој тогаш беше во младинскиот центар на Мајорка од која во 2015 година направи трансфер во Реал.
Оттогаш, тој забележа 239 настапи за Кралскиот клуб, постигнувајќи 50 голови.