Според Центрите за контрола и превенција на болести, повеќе од 600.000 луѓе во САД годишно умираат од кардиоваскуларни болести, кои исто така се водечка причина за смрт кај мажите и жените. Затоа, добро е да се знаат превентивните мерки.
Кардиологот Ендрју Фримен од National Jewish Health во Колорадо изјави за медиумите дека во другите култури каде што не е застапен седентарен начин на живот и консумирање преработена храна, ризикот од кардиоваскуларни заболувања е намален.
Иако е тешко да се елиминираат намирниците кои се штетни за здравјето на нашето срце, тој препорачува нивното внесување да се сведе на минимум. Докторката Шерон Хејс од Минесота изјавува дека не постои храна која ќе ве убие, туку клучна улога има изборот на храна.
Прекумерното уживање во виршли, салами, кулени, сланини, шунки и слични месни производи не влијае само на здравјето на срцето. Според Светската здравствена организација, консумирањето преработено месо може да предизвика рак.
Фримен и Хејс наведуваат да се држите настрана од кесички со солени и крцкави јаглехидрати. Иако кесичките за ужина изгледаат практично, подобро е да ги избегнувате бидејќи првенствено содржат едноставни јаглехидрати, но и големи количини масти, сол и други адитиви.
Кардиологот Фримен наведува дека слатки треба да јадеме во многу ограничени количини. Се препорачува да изберете само една порција слатки еднаш неделно за да го ограничите внесот на шеќер.
Иако внесот на протеини е важен за секојдневното функционирање на организмот, не треба да претерувате. Тоа е затоа што поголем внес ги оптоварува бубрезите и може да предизвика низа други проблеми. Освен тоа, како извор на протеини, луѓето најчесто консумираат црвено месо кое има висок процент на заситени масти кои се штетни за здравјето на срцето.
Повеќето ресторани за брза храна треба да се избегнуваат бидејќи на менито практично нема ништо што е здраво за нас. Ова се однесува дури и на храна која не е пржена бидејќи има тенденција да содржи прости јаглехидрати.
Енергетските пијалаци содржат додаден шеќер, но и состојки кои потенцијално можат да предизвикаат проблеми како висок крвен притисок или аритмија. Затоа, треба да го намалите внесот на кофеин.
Не е невообичаено човек да консумира три или четири пати повеќе од препорачаната дневна количина сол. Тоа е затоа што солта може да се најде во производи за кои можеби не сте свесни, како што се разни житарици или, на пример, кисели краставички.
Во последните неколку години, еден од трендовите во исхраната е да се заменат различните масла и масти со кокосово масло. Но, Фримен наведува дека ова масло содржи повеќе заситени масти од свинската маст. Тој истакнува дека кокосовото масло е користено во некои истражувања за да предизвика атеросклероза кај животните.
