Руди Гарсија повеќе не е тренер на Ал Наср, клубот чии бои ги брани Кристијано Роналдо.
Францускиот стручњак го презеде Ал Наср во јуни минатата година, а доби отказ поради наводен лош однос со играчите. Неговите резултати не беа на посакуваното ниво, но клубот сепак му прогледа низ прсти. Сепак, по конфликтот што го имал со играчите во соблекувалната, клупските челници решиле го отпуштат.
На седум натпревари до крајот на сезоната во првенството на Саудиска Арабија, Ал Наср е втор на табелата, со три бода помалку од лидерот Ал Итихад, од кого неодамна доживеа пораз. Исто така Ал Наср не успеа да се пласира во финалето на националниот куп.
Сѐ уште не е познато кој ќе биде наследникот на Гарсија.
Пред да седне на клупата на Ал Наср, Гарсија ги водеше Лион, Марсеј, Рома, Лил, Ле Ман, Дижон, Сент-Етјен и Корбеј-Есон.
