Синоќа Ал Наср ја постигна третата сезонска победа, а беа убедливи со високи 5:1 против Ал Хазем во натпревар од 5-тото коло.
Првата ѕвезда на клубот, воедно и најголемата фудбалска ѕвезда во Саудиска Арабија - Кристијано Роналдо - со гол и 2 асистенции имаше одличен настап на синоќешниот меч, но прво име на овој дуел беше саудискиот напаѓач Абдулрахман Гариб.
На синоќешниот натпревар споменатиот играч постигна гол и двапати асистираше, а со оглед на тоа што тие работи ги направи во решавачките моменти од играта на крајот беше прогласен и за најдобар играч.
Роналдо, пак, уште еднаш покажа дека е во одлична форма, со оглед на тоа што во првите пет кола постигнува гол на секој натпревар и моментално е на врвот на листата на стрелци со 6 гола.
Што се однесува до самата игра, Ал Наср поведе со головите на Гариб и Абдула Ал Хаибари во првото полувреме, а негативата се намали преку Мохамед Бадамоси во 47. минута.
Десет минути подоцна Роналдо асистираше до Отавиу да го зголеми водството, а до крајот на натпреварот конечниот резултат го потврдија Роналдо и Мане.
