Шпанците Серхио Рамос и Серхио Бускетс, како и Вилфрид Заха се на мета на саудискиот клуб Ал Наср, за кој од почетокот на годината настапува Кристијано Роналдо.
Со оглед на тоа дека го ангажираа славниот Португалец, Саудијците сакаат да донесат повеќе истакнати имиња на Блискиот Исток. Медиумите секојдневно наведуваат имиња на играчи кои саудиските клубови се обидуваат да ги ангажираат. Меѓу последните се споменуваат Заха, Рамос и Бускетс.
Заха влезе во последните месеци од договорот со Кристал Палас и одби повеќе понуди за продолжување на соработката. Тој е член на лондонскиот клуб од 2015 година, а играше и за Манчестер Јунајтед и Кардиф. Англиските медиуми пренесуваат дека за услугите на 30-годишниот напаѓач се заинтересирани и Арсенал и Милан, но нивните понуди финансиски не можат да се носат со онаа која доаѓа од Саудиска Арабија.
Се наведува и дека Серхио Рамос ја разгледува понудата за трансфер во Саудиска Арабија. Неговиот договор со ПСЖ истекува на крајот од оваа сезона. Рамос е во Париз од 2021 година, а претходно 16 години беше член на Реал Мадрид, а една сезона настапуваше и за првиот тим на Севиља.
Со преселба на Блискиот Исток се поврзува и асот на Барселона, Серхио Бускетс, кој е главен во средниот ред на Каталонците од 2008 година, а договорот му истекува на лето. Неговиот тренер и поранешен соиграч, Чави Ернандес, истакна дека би сакал Бускетс да остане на Камп Ноу.
Неодамна Mundo Deportivo објави дека Саудијците му нудат на Бускетс 18 милиони долари по сезона за двегодишен договор.