Алек Болдвин се врати на снимањето на филмот Rust, откако обвинителите во Ново Мексико во петокот го отфрлија обвинението за убиство од небрежност против него во фаталното пукање во октомври 2021 година во кое беше убиена кинематограферката Халина Хачинс.
Снимањето на нискобуџетниот вестерн започна минатата недела во Монтана. Болдвин во понеделникот на Instagram потврди дека е на снимање.
„Сега сум во близина на Бозман за да го завршам Rust. Монтана е прекрасна. Ви благодариме на сите за поддршката“, напиша актерот.
Мелина Спадоне, адвокатка на Rust Movie Productions, потврди дека снимањето треба да заврши до крајот на мај оваа година, пренесува The Hollywood Reporter. Снимањето беше прекинато во октомври 2021 година, откако пукна пиштолот што го држеше Болдвин, при што беше убиена кинематограферката Халина Хачинс и повреден беше режисерот Џоел Соуза.
Спадоне изјави дека снимањето ќе продолжи без никаква муниција или функционално оружје. Продолжувањето на снимањето го одобри Здружението на режисери на Америка, под услов да се зајакнат безбедносните мерки на сетот. Токму затоа, двајца ветерани за заштита при работа се приклучија на продукцијата и ќе го надгледуваат целото снимање.
Пристигнувањето на Болдвин во Монтана се совпаѓа со формалното повлекување на обвиненијата за убиство од небрежност против актерот. Обвинителите, на кои случајот им беше доделен во април, откако претходниот адвокат беше принуден да поднесе оставка, во поднесувањето на судот напишаа дека ги повлекуваат обвиненијата „бидејќи на виделина излегоа нови докази кои бараат дополнителна истрага и форензичка анализа“. Во соопштението објаснуваат дека обвинението може повторно да биде поднесено. Судијата што го надгледуваше случајот го одложи прелиминарното рочиште за 9 август, за да може обвинителите да повикаат дополнителни сведоци.
Режисерот Џоел Соуза за продолжувањето на снимањето рече: „Иако е горчливо-слатка ситуација, благодарен сум што нов, брилијантен и посветен продукциски тим се придружува на екипата за да го заврши она што Халина и јас го започнавме“.
Сопругот на Халина, Метју Хачинс, кој работи како извршен продуцент на филмот, со спогодба успеа да договори снимање на документарен филм за животот и делото на покојната снимателка.
