Селекторот на македонската фудбалска репрезентација, Игор Ангеловски, од синоќа е национален херој на земјава заедно со фудбалерите.
Тој не само што нѐ однесе на Европското првенство, туку донесе и историска победа над Германија во гости.
Сето ова се случуваше додека Ангеловски лично се соочувал со тешка семејна ситуација – неговата сопруга била хоспитализирана со симптоми на COVID-19.
Затоа Ангеловски беше особено емотивен по натпреварот и тогаш откри низ што поминувал:
„Овие момци уште еднаш ја направија горда Македонија против големата Германија. Тоа се нашите спортски херои, тоа се фудбалерите кои ја кренаа нацијата на нозе. Оваа победа е налик на пласманот на ЕП. Јас дојдов на собирот, а мојата сопруга беше хоспитализирана во болница со тешки симптоми на COVID-19. Ѝ ја посветувам оваа победа на неа и на целиот медицински персонал кој се бореше за неа. Заедно со моите деца, моето семејство, тие се мојата најголема поддршка.
Македонија сега се вклучува во трка за пласман на светско првенство. Сега можеме да жалиме што не освоивме уште некој бод во Романија. Морам да кажам и дека имаше многу опструкции, токму на оние на кои им ја донесовме оваа победа, еве им ја посветувам, се надевам ќе се освестат и ќе почнат да нѐ почитуваат“, изјави селекторот Ангеловски на прес – конференцијата по мечот.