Добитничката на златниот медал во екипна конкуренција во уметничко лизгање на Зимските олимписки игри во Пекинг, Камила Валиева (15) имала позитивен допинг тест пред почетокот на Игрите, пишува рускиот весник Kommersant.
Одложувањето на церемонијата на доделување медали, закажана за вторник во Пекинг, беше поврзано со позитивниот допинг тест на руската лизгачка, што би можело да ѝ го одземе екипното злато на Русија.
Kommersant пишува дека идентификуваната супстанца била триметазидин, кој се користи за ублажување на ангина пекторис и е забранет од 2014 година.
И други руски медиуми ги потврдуваат овие пишувања, па весникот RBC објави дека Валиева паднала на контролата спроведена во декември.
„Немам коментар за медиумските шпекулации“, изјави денеска портпаролот на Меѓународниот олимписки комитет, Марк Адамс, за време на дневниот брифинг на олимпиското тело во Пекинг.
15-годишната Валиева е фаворит за златото во пресрет на поединечното натпреварување кое започнува во вторник.
Да потсетиме, новата сензација на уметничко лизгање стана првата жена која изведе четворократен скок за време на екипното натпреварување.