„Чудото од Казањ“, така ја нарекуваат маестралната руска лизгачка Камила Валиева, која на ЗОИ во Пекинг имаше историски настап. Русинката елегантно го изведе еден од најтешките скокови во уметничко лизгање, толку тежок што досега ниту една друга жена го нема изведено на Олимписките игри.
Петнаесетгодишната девојка од Казањ двапати скокна во четворократен скок. Нејзиниот перформанс донесе златен медал за рускиот тим, додека САД освоија сребро, а Јапонија бронза.
Четворократните скокови бараат најмалку четири движења во воздух. Почести се во машкото уметничко лизгање, но досега ниту една жена ги нема изведено на Олимписките игри. Тоа успеа да го направи Камила Валиеава, чудото од рускиот град Казањ.
Родена е на 26 април 2006 година, а со лизгање почнала да се занимава во 2009 година. Како дете вежбала гимнастика и балет, но за неа не биле доволен предизвик. Поради големиот талент, со мајка си се преселила во Москва. Во 2018 година почнала да вежба со тренерот Етери Георгиевна со која и денес соработува.
Камила држи девет светски рекорди во лизгање. Сега, нејзиниот тим освои злато и Валиева ќе се натпреварува во женско индивидуално лизгање во кратката програма на 15 февруари и во слободно лизгање на 17 февруари.
Во интервју за кинеските медиуми порача да не очекуваме нови неверојатни скокови.
„Мислам дека секој можен скок е веќе изведен, скоро и да не останаа скокови“, вели талентираната Русинка.
