Кралицата Елизабета Втора изрази „загриженост“ во врска со обвинувањата за расизам, изнесени од војводата и војвотката од Сасекс.
Таа исто така почувствувала тага кога дознала колкав предизвик им бил животот на двајцата додека биле ангажирани членови на кралското семејство.
Бакингемската палата конечно го прекина молкот во врска со експлозивните тврдења на Хари и Меган, дадени во интервју со Опра Винфри, велејќи дека покренатите прашања ќе бидат сфатени „сериозно“ и ќе се решаваат „приватно“ во кралското семејство.
Во краткото соопштение издадено во име на кралицата се вели: „Целото семејство се растажи кога дозна колкав предизвик им биле на Хари и Меган изминатите неколку години. Покренатите прашања, особено прашањето околу расата, се загрижувачки. Иако некои сеќавања може да варираат, се сфаќаат многу сериозно и семејството ќе ги реши приватно. Хари, Меган и Арчи секогаш ќе бидат многу сакани членови на семејството“.
Изјавата следеше по дводневните кризни разговори меѓу високите членови на кралското семејство и помошниците во палатата за тоа како најдобро да се справат со јавните последици од штетното интервју.
Бакингемската палата не била претходно предупредена за содржината на интервјуто.
