Турбулентно беше на последниот ден од преодниот рок во каталонската престолнина каде се случија неколку неочекувани трансфери.
Требаше да биде лидер на новата Барселона без Лео Меси, но Антоан Гризман нема ниту да се обиде да го направи тоа. Неуспешната авантура во Каталонија одлучи да ја прекине и да се врати онаму каде блескаше - во мадридски Атлетико.
Гризман замина во Атлетико на позајмица со тоа што мадриѓаните потоа ќе треба да го откупат за 40 милиони евра. Тоа е дури 80 милиони помалку од сумата која пред две години ја платија Каталонците за да го донесат како големо засилување. Но, добрата вест за Барса е тоа што Атлетко ќе ја плаќа целата негова плата.
Заминувањето на Гризман Барса го надополни со двајца одлични напаѓачи. Прво, конечно успеа да го регистрира Серхио Агуеро кој поради финансиските проблеми не можеше да биде регистриран како играч на клубот. Иако Меси си замина, а со тоа клубот се ослободи и од неговата огромна плата, финансискиот фер-плеј сепак и натаму му се закануваше на клубот со блокада, па затоа четворицата капитени (Бускетс, Пике, Сержи и Алба) доброволно си ги намалија платите овозможувајќи му на клубот да ги регистрира прво Мемфис Депај, Ерик Гарсија и Реј Манај, а сега конечно и Агуеро.
Пред затворањето на преодниот рок Барселона оствари уште едно засилување: го донесе холадскиот напаѓач Лук де Јонг од Севиља. Доаѓа на едногодишна позајмица, а Каталонците имаат право на откуп наредното лето.
Де Јонг, кој пред неколку дена го прослави 31. роденден, во Севиља дојде пред две години за 12,5 милиони евра од редовите на ПСВ каде жареше и палеше. Но, во андалузискиот тим не се пронајде и во првата сезона постигна едвај 10 гола и 4 асистенции во сите натпреварувања, а се мачеше и лани остварувајќи слични бројки: 9 гола и 1 асистенција.