Спенсер Елден, човекот кој како бебе се најде на омотот на албумот Nevermind, ја тужи Нирвана за сексуална експлоатација.
Омотот на албумот, издаден пред 30 години, го прикажува Елден како голо бебе кое плива во вода и посегнува по банкнота од еден долар. Сега, по три децении тој смета дека фотографијата е алузија за детска порнографија.
Вели дека неговите родители никогаш не дале писмена согласност за употреба на негова фотографија на албумот, пишува BBC.
Елден тврди дека неговиот вистински идентитет и името засекогаш ќе останат поврзани со комерцијална сексуална експлоатација што ја доживеал како малолетник. Вели дека многу страдал и ќе страда во текот на целиот живот поради постојан емоционален претрпен стрес.
Бара отштета од најмалку 150.000 долари од секој од петнаесетте обвинети меѓу кои и поранешната сопруга на Курт Кобејн, Кортни Лав како и од фотографот Кирк Ведл.
Елден досега повеќе пати има објавено имитација од фотографијата како тинејџер и возрасен, облечен во шорцеви за пливање, со цел да одбележи годишнина од албумот.
