Поранешниот британски фудбалер Дејвид Бекам постигна договор според кој ќе стане амбасадор на Светското првенство во Катар, но ќе работи и на промоција на земјата во следните десет години.
Бекам на почетокот на овој месец беше во Катар, ги разгледа и ги посети стадионите на кои ќе се игра Светското првенство следната година. Популарниот Бекс ќе има официјална улога, а следниот месец и официјално ќе стане амбасадор задолжен за промоција на туризмот и културата во Катар.
На 46-годишниот Бекам му било кажано дека знамињата со боите на виножитото ќе бидат дозволени на Светското првенство, иако тоа е земја која е критикувана за кршење на човековите права, особено против хомосексуалците.
„Дејвид отсекогаш велел дека фудбалот има моќ да донесе добро на многу нивоа. Тој ќе се приклучи на пошироката фудбалска заедница, која ќе се обедини за Светското првенство во 2022 година и тој се радува на турнир за кој верува дека ќе биде одличен“, изјави портпаролката на Бекам.
Неговиот однос со Катар не е ништо ново, бидејќи претходно играше за ПСЖ. Договорот за улогата на амбасадор е веројатно резултат на пријателството на Давид со катарскиот претседател на ПСЖ, Насер Ал-Хелајфи.
Овој договор на Бекам ќе му донесе 150 милиони фунти.
